Bagatoz

Antapara, ateri, aterpe. Babes, babesgarri, babesgune, babespe. Beroki, estalgune, estalpe. Gorape, gordegarri. Hegazpe, itzalpe, lehorpe, magalpe. Begiragailu. Geriza, malda, sikupe. Babeski, babesleku. Aterki, gerizagarri. Hegipe. Eskepe.

Hogeita sei hitz, esanahi bakarra. Edo agian ez, agian berdina bai, baina bera ez. Agian geriza esan nahi duenak ez du esan nahi aterpe. Edo alderantziz. Agian jakin gabe ere badaki beroki esan nahi duenak ez duela esan nahi hegipe.

Kosta zaigu ulertzea nola aurki dezakegun estalpea; ateria, babeskia, sare sozialetan. Nola izan daitekeen babesleku erakusleiho bat. Baina saiatzera gatoz, nire hitzak eta ni; beraiek lehenengo, eta ni, ausartzen banaiz, agertuko naiz ondotik.

Bultzadatxo bati esker bagatoz, hitz bakarraren atzetik. Gaurkoan bultzadatxoa Goiuri (Jocelyn edo Sheilis, berak badaki), eta hitza antapara. Ez dakidan arren badakit esan nahi dudala antapara eta ez ateri.